ވާރޭ ވެހި ފެން ބޮޑުވާ ރަށްރަށަށް ނޭޝަނަލް ޑިޒާސްޓާ މެނޭޖްމެންޓް އޮތޯރިޓީ (އެންޑީއެމްއޭ) އިން ފެން ހިންދާ ޕަންޕު ފޯރުކޮށްދީފިއެވެ.މިއީ ރަށްރަށަށް ފެންބޮޑުވުމުން ލިބޭ ގެއްލުން ކުޑަކުރުމުގެ ގޮތުން އެންޑީއެމްއޭއިން އެކުލަވާލައިފައިވާ ޕްރޮޖެކްޓެއްގެ ދަށުން ހަވާލު ކުރެވޭ ޕަންޕު ތަކެކެވެ.

މި ޕްރޮޖެކްޓުގެ ދަށުން ފެންހިއްކާ ޕަންޕު ހަވާލު ކުރުމަށް ހަމަޖެހިފައިވާ ފުރަތަމަ ފަސް ރަށަށް މިހާރު ޕަންޕު ހަވާލު ކޮށްފިއެވެ. އޭގެތެރޭގައި ހިމެނެނީ ބ. މާޅޮސް، ބ. ކެންދޫ، ބ. ތުޅާދޫ އަދި ޅ. ނައިފަރުގެ އިތުރުން ޅ. ކުރެންދޫއެވެ.އެ ރަށްތަކާއި، އެ ތަކެތި ހަވާލު ކުރުމަށް އެންޑީއެމްއޭ އާއި ޑިފެންސް މިނިސްޓްރީ އަދި ސިފައިންގެ ޓީމެއް ވަނީ އެ ރަށްތަކަށް ޒިޔާރާތް ކޮށްފައެވެ.

މި ޓީމުގައި ޑިފެންސް މިނިސްޓްރީގެ ނައިބު ހުސެން ޒާހިރު ބައިވެރިވެ ވަޑައިގަތެވެ.އެމަނިކުފާނުގެ އަރިހުގައި ޑިޒާސްޓާ މެނޭޖްމަންޓް އޮތޯރިޓީގެ ސީއީއޯ ޙިސާން ހަސަން އަދި ވައިސް ޗީފް އޮފް ޑިފެންސް ފޯސް މޭޖާ ޖެނެރަލް އަބްދުއްރަހީމް އަބްދުއްލަތީފްގެ އިތުރުން ސިފައިންގެ ނޮދަން އޭރިޔާ ކޮމާންޑްގެ އިސް އޮފިސަރުން ވެސް ވަނީ ބައިވެރިވެވަޑައިގެންފައެވެ.

އެ ޓީމުން ވަނީ މި އޮގަސްޓް މަހުގެ 27 އިން 29 އަށް މި ރަށްތަކަށް ޒިޔާރަތްކޮށްފައެވެ.

ދައުލަތުން 1.4 މިލިއަން ރުފިޔާ ހަރަދު ކޮށްގެން ހިންގާ މި ޕްރޮޖެކްޓަކީ، ގުދުރަތީ ކާރިސާ ތަކުގެ ސަބަބުން ބޮޑެތި ގެއްލުންތައް ތަހަންމަލު ކުރަން ޖެހޭ ރަށްތަކުގެ ތެރެއިން ވަސީލަތް ނެތް 18 ރަށަކަށް އެކަމަށް ބޭނުންވާ ވަސީލަތްތައް ފޯރުކޮށްދިނުމަށް ފެށި ޕްރޮޖެކްޓެކެވެ.އެންޑީއެމްއޭއިން ބުނީ ބާކީ 13 ރަށަށް ވެސް ވަރަށް އަވަހަށް ފެން ހިންދާ ޕަންޕާއި، އެއާއެކު އިތުރަށް ބޭނުންވާ ސާމާނު ވަރަށް އަވަހަށް ފޯރުކޮށްދޭނެ ކަމަށެވެ.