ރާއްޖެއަށް މިހާރު ކުރަމުންދާ ވިއްސާރައިގައި ގިނަ ރަށްތަކަކަށް ބޮޑެތި ގެއްލުންތަކެއް ވަނީ ލިބިފައެވެ. ނެޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން މިއަދު ހާމަކުރި މަޢުލޫމާތުގައިވާ ގޮތުން، މިއަދުގެ 14:00 އާ ހަމައަށް 13 ރަށެއްގެ 77 ގެއަކަށް ގެއްލުން ލިބި، އެސެސްމަންޓް ފޯމް ވަނީ ހުށަހަޅާފައެވެ. މީގެ އިތުރުން 3 ރަށެއްގެ ދަނޑުބިންތަކަށްވެސް ބޮޑެތި ގެއްލުތަކެއް ވަނީބިފައެވެ. މިހާރު ކުރެވެމުންދަނީ މި ފޯމްތަކުގެ ގެއްލުންތައް ވަޒަންކުރުމުގެ މަސައްކަތެވެ.

އަދި މި ވިއްސާރައިގައި މާލޭގައި ފެންބޮޑުވުމުގެ ސަބަބުން އެސެސްމަންޓް ހަދަންޖެހޭކަމަށް ފާހަގަކުރެވުނު 41 ގެއެއްގެ ތެރެއިން 37 ގެއެއްގެ އެސެސްމަންޓް ވަނީ ހަދާ ނިމިފައެވެ. ނަމަވެސް 4 ގެއަކުން އެސެސްމަންޓް ހަދަން ބޭނުން ނުވާކަމަށް އެންގިއެވެ.

މި ވިއްސާރައިގައި މާލޭގެ ގެތަކުގެ އިމާރާތްތަކަށާއި ހިފާ ގެންގުޅޭ ތަކެއްޗަށް 819،549 ރުފިޔާގެ ގެއްލުން ލިބިފައިވެއެވެ. މި ވިއްސާރައިގައި ގެއްލުންވި ގެތަކަށް އެހީތެރިކަން ފޯރުކޮށްދިނުމަށްޓަކައި، އެންޑީއެމްއޭ އިން ވަނީ ގެއްލުންތައް ވަޒަންކޮށް، އެހީތެރިކަން ފޯރުކޮށްދޭނެ މިންވަރު ކަނޑައަޅާފައެވެ. އަދި ކުރިއަށް އޮތް ދުވަސްތަކުގައި މި އެހީތެރިކަން ފޯރުކޮށްދެވޭނެއެވެ.